ಸ್ವಾತಂತ್ರ್ಯ ದಿನಾಚರಣೆಗೆಂದು ಗಣ್ಯರು, ನಾಗರಿಕರು ಶುಭಾಶಯ ತಿಳಿಸಲು ಬಾವುಟ ಹಿಡಿದ ಚಿತ್ರವನ್ನು ಹಂಚಿಕೊಳ್ಳುವುದು ಸಾಮಾನ್ಯ. ಆದರೆ, ಕ್ರಿಕೆಟಿಗ ರೋಹಿತ್ ಶರ್ಮ ತಿರಂಗ ಹಿಡಿದಂತೆ ಎಡಿಟೆಡ್ ಫೋಟೋ ಹಂಚಿ ಸಾಮಾಜಿಕ ಮಾಧ್ಯಮಗಳಲ್ಲಿ ಪೇಚಿಗೆ ಸಿಲುಕಿದ್ದಾರೆ.
75 ನೇ ವರ್ಷದ ಸ್ವಾತಂತ್ರ್ಯೋತ್ಸವದ ಹಾರ್ದಿಕ ಶುಭಾಶಯಗಳು ಎಂಬ ಒಕ್ಕಣೆಯೊಂದಿಗೆ ಚಿತ್ರವನ್ನು ಹಂಚಿಕೊಂಡಿರುವ ರೋಹಿತ್ ಶರ್ಮರನ್ನು ನೆಟ್ಟಿಗರು ಹಿಗ್ಗಾಮುಗ್ಗಾ ಜಾಡಿಸುತ್ತಿದ್ದಾರೆ. ರೋಹಿತ್ ಕೈಯಲ್ಲಿ ಬಾವುಟ ಹಿಡಿದ ಚಿತ್ರವನ್ನು ಹಂಚಿಕೊಂಡಿದ್ದು, ಚಿತ್ರದಲ್ಲಿ ಇರುವ ಬಾವುಟವು ನೈಜವಾದದ್ದಲ್ಲ, ನಕಲಿ ಎಂದು ಹಲವು ನೆಟ್ಟಿಗರು ಟೀಕಿಸಿದ್ದಾರೆ.
ನಿಜವಾದ ಧ್ವಜವನ್ನು ಕೈಯಲ್ಲಿ ಹಿಡಿಯಲು ಕೂಡಾ ರೋಹಿತ್ ಶರ್ಮರಿಗೆ ಆಗುವುದಿಲ್ಲವೇ? ನಿಮ್ಮ ಅಕೌಂಟ್ ನಂಬರನ್ನು ಕೊಡಿ ಸಹೋದರ, ನಿಮಗೆ ಧ್ವಜಕ್ಕೆ ಬೇಕಾದ ದುಡ್ಡನ್ನು ನಾವೇ ಕೊಡುತ್ತೇವೆ. ನಿಜವಾದ ಬಾವುಟದೊಂದಿಗೆ ಫೋಟೋ ತೆಗೆಯಲು ಎಡಿಟ್ ಮಾಡುವಷ್ಟೂ ಸಮಯ ಬೇಡ ಎಂಬೆಲ್ಲಾ ಕಾಮೆಂಟುಗಳನ್ನು ಹಾಕಿರುವ ನೆಟ್ಟಿಗರು ಶರ್ಮಾರನ್ನು ತೀವ್ರವಾಗಿ ಟೀಕಿಸಿದ್ದಾರೆ.
“ನಿಜವಾದ ಬಾವುಟವನ್ನು ಹಿಡಿದು ಫೋಟೋ ತೆಗೆಯಲು ಏನಾಗಿತ್ತು? ಯಾಕಾಗಿ ಧ್ವಜ ಹಿಡಿದಂತೆ ಫೋಟೋಶಾಪ್ ಮಾಡಿದ ಚಿತ್ರಗಳನ್ನು ಮಾಡುತ್ತಾರೆ .” “ನಿಜವಾದ ಬಾವುಟವನ್ನೂ ಕೊಳ್ಳಲಾಗಲಿಲ್ಲ ನೀವು ನನ್ನ ಕ್ಯಾಪ್ಟನ್ ಅಲ್ಲ” ಎಂದೆಲ್ಲಾ ನೆಟ್ಟಿಗರು ರೋಹಿತ್ ರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ.
