ಬಾಹ್ಯಾಕಾಶ ಪ್ರಿಯರಿಗೆ ಸಂತಸದ ಸುದ್ದಿ ಕೇಳಿಬಂದಿದ್ದು, ಒಮ್ಮೆ ಸೌರಮಂಡಲದ ಒಂಬತ್ತನೇ ಗ್ರಹವೆಂದು ಪರಿಗಣಿಸಲ್ಪಟ್ಟಿದ್ದ Pluto ಮತ್ತೆ ಗ್ರಹ ಸ್ಥಾನಮಾನ ಪಡೆಯುವ ಸಾಧ್ಯತೆ ಕುರಿತು ಹೊಸ ಚರ್ಚೆಗಳು ಆರಂಭವಾಗಿವೆ.ಈ ಕುತೂಹಲಕ್ಕೆ ಕಾರಣವಾಗಿರುವುದು 10 ವರ್ಷದ ಬಾಲಕಿಯೊಬ್ಬಳು NASA ಗೆ ಬರೆದ ಮನಮುಟ್ಟುವ ಪತ್ರ. 2006ರಲ್ಲಿ International Astronomical Union ಪ್ಲೂಟೋವನ್ನು ‘ಕುಬ್ಜ ಗ್ರಹ’ (Dwarf Planet) ಎಂದು ವರ್ಗೀಕರಿಸಿ ಗ್ರಹಗಳ ಪಟ್ಟಿಯಿಂದ ಹೊರಹಾಕಿತ್ತು. ಇದರ ಪರಿಣಾಮವಾಗಿ ಸೌರಮಂಡಲದ ಗ್ರಹಗಳ ಸಂಖ್ಯೆ ಒಂಬತ್ತರಿಂದ ಎಂಟಕ್ಕೆ ಇಳಿಯಿತು.
ಈ ನಿರ್ಧಾರವನ್ನು ಒಪ್ಪದ ಕಾಯ್ಲಾ ಎಂಬ ಬಾಲಕಿ ನಾಸಾಗೆ ಪತ್ರ ಬರೆದು, “ಪ್ಲೂಟೋ ನಮ್ಮ ಸೌರಮಂಡಲದ ಭಾಗವಾಗಿದ್ದು, ಅದನ್ನು ಮತ್ತೆ ಗ್ರಹವಾಗಿ ಪರಿಗಣಿಸಬೇಕು” ಎಂದು ಮನವಿ ಮಾಡಿದ್ದಾಳೆ. ತನ್ನ ಪತ್ರದಲ್ಲಿ ಪ್ಲೂಟೋ ಕುರಿತ ವೈಜ್ಞಾನಿಕ ಮಾಹಿತಿಗಳನ್ನೂ ವಿವರಿಸಿದ್ದಾಳೆ. ಪ್ಲೂಟೋ ಕೈಪರ್ ಬೆಲ್ಟ್ ಪ್ರದೇಶದಲ್ಲಿದ್ದು, 1930ರಲ್ಲಿ Clyde Tombaugh ಕಂಡುಹಿಡಿದದ್ದು ಹಾಗೂ ಇದಕ್ಕೆ ಐದು ಉಪಗ್ರಹಗಳಿರುವುದನ್ನು ಉಲ್ಲೇಖಿಸಿದ್ದಾಳೆ.
ಈ ಪತ್ರ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ನಾಸಾ ಆಡಳಿತಾಧಿಕಾರಿ Jared Isaacman ಅವರ ಗಮನ ಸೆಳೆದಿದೆ. ಬಾಲಕಿಯ ಮನವಿಗೆ ಸ್ಪಂದಿಸಿದ ಅವರು, “ಈ ವಿಷಯವನ್ನು ಪರಿಶೀಲಿಸುತ್ತಿದ್ದೇವೆ” ಎಂದು ಭರವಸೆ ನೀಡಿದ್ದಾರೆ.ಈ ಬೆಳವಣಿಗೆ ಪ್ಲೂಟೋ ಸ್ಥಾನಮಾನ ಕುರಿತು ವಿಜ್ಞಾನ ಲೋಕದಲ್ಲಿ ಮತ್ತೊಮ್ಮೆ ಚರ್ಚೆಗೆ ಕಾರಣವಾಗಿದ್ದು, ಭವಿಷ್ಯದಲ್ಲಿ ಪ್ಲೂಟೋಗೆ ಮತ್ತೆ ಗ್ರಹ ಸ್ಥಾನಮಾನ ಸಿಗುವ ಸಾಧ್ಯತೆಯನ್ನೂ ತಳ್ಳಿಹಾಕಲು ಸಾಧ್ಯವಿಲ್ಲ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಬಾಲಕಿಯ ಪ್ರಯತ್ನಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
