ಅಮೆರಿಕದ ಡಾಲರ್ ಎದುರು ರೂಪಾಯಿ ಮೌಲ್ಯ ದಿನೇ ದಿನೆ ಕುಸಿದು ಇಂದು ಶುಕ್ರವಾರ 79 ರೂ. ಮಟ್ಟಕ್ಕೆ ತಲುಪಿದೆ. ಈ ಕುಸಿತನ್ನು ಒಪ್ಪೊಕೊಳ್ಳದ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್, “ಡಾಲರ್ಎದುರು ಇತರ ಜಾಗತಿಕ ಕರೆನ್ಸಿಗಳಿಗಿಂತ ರೂಪಾಯಿ ಮೌಲ್ಯ ಉತ್ತಮ ಮಟ್ಟದಲ್ಲಿಯೇ ಇದೆ,” ಎಂದು ಗುರುವಾರ ಸಮರ್ಥಿಸಿಕೊಂಡಿದ್ದಾರೆ.
“ಬೇರೆ ರಾಷ್ಟ್ರಗಳಿಗೆ ಹೋಲಿಸಿದರೆ ನಾವು ತುಲನಾತ್ಮಕವಾಗಿ ಉತ್ತಮವಾಗಿದ್ದೇವೆ. ನಾವು ಮುಚ್ಚಿದ ಆರ್ಥಿಕತೆಯನ್ನು ಹೊಂದಿಲ್ಲ. ಜಾಗತಿಕ ಆರ್ಥಿಕತೆಯಲ್ಲಿ ನಾವೂ ಒಂದು ಭಾಗವಾಗಿದ್ದೇವೆ. ಜಾಗತಿಕ ಬೆಳವಣಿಗೆಗಳು ಮತ್ತು ಪ್ರಭಾವಗಳು ಭಾರತದ ಮೇಲೂ ಆಗುತ್ತಿದೆ,” ಎಂದು ನಿರ್ಮಲಾ ಸೀತಾರಾಮನ್ ಸಮಜಾಯಿಷಿ ನೀಡಿದ್ದಾರೆ.
ರಷ್ಯಾ-ಉಕ್ರೇನ್ ಸಂಘರ್ಷ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಚ್ಚಾ ತೈಲದ ದರ ಏರಿಕೆ, ನಿರಂತರ ಹಣದುಬ್ಬರ ಮತ್ತು ಜಾಗತಿಕ ಪ್ರಭಾವಗಳಿಂದ ರೂಪಾಯಿ ಮೌಲ್ಯ ಪಾತಾಳಕ್ಕೆ ತಲುಪಿದೆ ಎಂದು ಸಮರ್ಥನೆ ಮಾಡಿಕೊಂಡಿದ್ದಾರೆ.