ಕಳೆದ ಮೂರು ದಿನಗಳಿಂದ ದೆಹಲಿಯನ್ನು ಸುಡುತ್ತಿರುವ ಬಿಸಿಗಾಳಿಯು ಶನಿವಾರ ಉಲ್ಬಣಗೊಳ್ಳಲಿದೆ ಎಂದು ಹವಾಮಾನ ಇಲಾಖೆ ಮೊದಲೇ ಎಚ್ಚರಿಕೆ ನೀಡಿ ಆರೆಂಜ್ ಅಲರ್ಟ್ ಘೋಷಿಸಿತ್ತು. ನಗರದ ಕೆಲವು ಭಾಗಗಳಲ್ಲಿ 46-47 ಡಿಗ್ರಿ ಸೆಲ್ಸಿಯಸ್ ಉಷ್ಣತೆ ದಾಖಲಾಗಬಹುದೆಂದು ಅಂದಾಜು ಮಾಡಲಾಗಿತ್ತು.
ದೆಹಲಿಯ ಮೂಲ ನಿಲ್ದಾಣವಾದ ಸಫ್ದರ್ಜಂಗ್ ವೀಕ್ಷಣಾಲಯದಲ್ಲಿ ಶುಕ್ರವಾರದ ಗರಿಷ್ಠ ತಾಪಮಾನವು 42.5 ಡಿಗ್ರಿಯನ್ನು ಆಧಾರವಾಗಿಟ್ಟು ಶನಿವಾರ ಈ ತಾಪಮಾನ 44 ಡಿಗ್ರಿ ಸೆಲ್ಸಿಯಸ್ನಲ್ಲಿ ನೆಲೆಸಲಿದೆ ಎಂದು ಮೊದಲು ಊಹಿಸಲಾಗಿತ್ತು. ಆದರೆ ಶನಿವಾರ ಸಫ್ದರ್ಜಂಗ್ನಲ್ಲಿ 45.4 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿತ್ತು. ಇದು ದೆಹಲಿಯಲ್ಲಿ ದಾಖಲಾಗುವ ಸಾಮಾನ್ಯ ತಾಪಮಾನಕ್ಕಿಂತ ಐದು ಡಿಗ್ರಿ ಹೆಚ್ಚು ಮತ್ತು ಈ ಋತುವಿನಲ್ಲಿ ದಾಖಲಾದ ಅತ್ಯಂತ ಹೆಚ್ಚಿನ ತಾಪಮಾನವಾಗಿದೆ.
ಶನಿವಾರ ದೆಹಲಿಯ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್ನಲ್ಲಿ 46.9 ಡಿಗ್ರಿ ಸೆಲ್ಸಿಯಸ್, ಪಿತಾಂಪುರದಲ್ಲಿ 46.4 ಡಿಗ್ರಿ ಸೆಲ್ಸಿಯಸ್, ಜಾಫರ್ಪುರದಲ್ಲಿ 45.8 ಡಿಗ್ರಿ ಸೆಲ್ಸಿಯಸ್ ಮತ್ತು ರಿಡ್ಜ್ ಮತ್ತು ಅಯಾನಗರದಲ್ಲಿ 45.4 ಡಿಗ್ರಿ ಸೆಲ್ಸಿಯಸ್, ಮಂಗೇಶ್ಪುರ್ನಲ್ಲಿ 47.2 ಮತ್ತು ನಜಾಫ್ಗರ್ಲ್ಲಿ 47 ಡಿಗ್ರಿ ಸೆಲ್ಸಿಯಸ್ಗೆ ಏರಿಕೆ ಕಂಡಿದೆ. ಸಾಮಾನ್ಯವಾಗಿ ಗರಿಷ್ಠ ತಾಪಮಾನವು 47 ಡಿಗ್ರಿ ಸೆಲ್ಸಿಯಸ್ ಮಾರ್ಕ್ ಅನ್ನು ದಾಟಿದರೆ ತೀವ್ರವಾದ ಶಾಖದ ಅಲೆಯನ್ನು ಘೋಷಿಸಲಾಗುತ್ತದೆ.
ಭಾನುವಾರದಂದು ಬಿಸಿಗಾಳಿಯು ಮತ್ತಷ್ಟು ಉಲ್ಬಣಗೊಳ್ಳಲಿದೆ ಎಂದು ಹವಾಮಾನ ಮುನ್ಸೂಚಕರು ತಿಳಿಸಿದ್ದಾರೆ. ಭಾನುವಾರವೂ ತೀವ್ರವಾದ ಶಾಖದ ಅಲೆಯ ಬಗ್ಗೆ ಜನರಿಗೆ ಎಚ್ಚರಿಕೆ ನೀಡಲು ‘ಆರೆಂಜ್’ ಅಲರ್ಟ್ ಘೋಷಿಸಲಾಗಿದೆ. ಹವಾಮಾನ ಎಚ್ಚರಿಕೆಗಳಿಗಾಗಿ IMD ನಾಲ್ಕು ಬಣ್ಣದ ಕೋಡ್ಗಳನ್ನು ಬಳಸುತ್ತಿದ್ದು ಹಸಿರು (ಯಾವುದೇ ಕ್ರಿಯೆಯ ಅಗತ್ಯವಿಲ್ಲ), ಹಳದಿ (ವೀಕ್ಷಿಸಿ ಮತ್ತು ), ಕಿತ್ತಳೆ (ಸಿದ್ಧರಾಗಿರಿ) ಮತ್ತು ಕೆಂಪು (ಕ್ರಮ ತೆಗೆದುಕೊಳ್ಳಿ).
ಈ ಬೇಸಿಗೆಯಲ್ಲಿ ಒಟ್ಟು ಐದು ಬಾರಿ ದೆಹಲಿಯಲ್ಲಿ ಬಿಸಿ ಗಾಳಿ ಬೀಸಿದ್ದು ಮೋಡ ಕವಿದ ಆಕಾಶ ಮತ್ತು ಗುಡುಗು ಮುಂದಿನ ವಾರ ತೀವ್ರವಾದ ಶಾಖದಿಂದ ಸ್ವಲ್ಪ ಮಟ್ಟಿಗಿನ ಮುಕ್ತಿ ನೀಡಬಹುದು ಎಂದು ನಿರೀಕ್ಷಿಸಲಾಗಿದೆ.
ದೆಹಲಿಯು ಈ ಬಾರಿ 122 ವರ್ಷಗಳಲ್ಲಿ ಅತ್ಯಂತ ಹೆಚ್ಚು ತಾಪಮಾನದ ಎಪ್ರಿಲ್ನ್ನು ಕಂಡಿದ್ದು ತಿಂಗಳಾಂತ್ಯದಲ್ಲಿ ಬಿಸಿಗಾಳಿಯು ನಗರದ ಹಲವಾರು ಭಾಗಗಳಲ್ಲಿ ಉಷ್ಣತೆಯನ್ನು 46 ಮತ್ತು 47 ಡಿಗ್ರಿ ಸೆಲ್ಸಿಯಸ್ಗೆ ಏರಿಸಿತ್ತು. ಅಲ್ಲದೆ ಸಾಧಾರಣವಾಗಿ ದೆಹಲಿಯಲ್ಲಿ ಏಪ್ರಿಲ್ನಲ್ಲಿ ಮಾಸಿಕ ಸರಾಸರಿ 12.2 ಮಿಮೀ ಮಳೆಯಾಗುತ್ತದೆ. ಈ ಬಾರಿ 0.3 ಮಿಮೀ ಕಡಿಮೆ ಮಳೆಯಾಗಿದೆ. ಮಾರ್ಚ್ನಲ್ಲಿ ಸರಾಸರಿ ಮಳೆ 15.9 ಮಳೆಯಾಗುತ್ತದೆ ಈ ಬಾರಿ ಮಳೆ ಬಂದೇ ಇಲ್ಲ.