ಇತ್ತೀಚೆಗಷ್ಟೇ ಬಿಬಿಎಂಪಿ ಹೊಸ ನಾಲ್ಕು ಫ್ಲೈ ಓವರ್ ಮಾಡ್ತೀವಿ ಎಂದಿತ್ತು. ಇದಕ್ಕಂತ ಸರ್ಕಾರ ಕೂಡ ಕೋಟಿ ಕೋಟಿ ಅನುದಾನ ಬಿಡುಗಡೆ ಮಾಡಿತ್ತು. ಆದರೀಗ ನಾಲ್ಕು ಮೇಲ್ಸೇತುವೆಗಳ ಪೈಕಿ ಎರಡು ಮೇಲ್ಸೇತುವೆಗಳಿಗೆ ನಿರ್ಮಾಣಕ್ಕೂ ಮೊದಲೇ ವಿಘ್ನ ಎದುರಾಗಿದೆ. ನಮ್ಮ ಮೆಟ್ರೋ ಇಲ್ಲಿ ಫ್ಲೈ ಓವರ್ ಮಾಡೋಕೆ ಕಷ್ಟಸಾಧ್ಯ ಅಂತಿದೆ.
ಬಿಬಿಎಂಪಿ ಎರಡು ಫ್ಲೈ ಓವರ್ ಗಳ ನಿರ್ಮಾಣಕ್ಕೆ ನಮ್ಮ ಮೆಟ್ರೋ ಕಾಮಾಗರಿ ಅಡ್ಡಿ !
ಜೆಸಿ ರಸ್ತೆ, ವೆಸ್ಟ್ ಆಫ್ ಕಾರ್ಡ್, ಸಾರಕ್ಕಿ ಜಂಕ್ಷನ್, ಕಾಮಾಕ್ಯ ಜಂಕ್ಷನ್ ಸೇರಿದ ಹೊಸ ನಾಲ್ಕು ಮೇಲ್ಸೇತುವೆಗಳ ನಿರ್ಮಾಣಕ್ಕೆ ಬಿಬಿಎಂಪಿ ಮುಂದಾಗಿತ್ತು. ಇದಕ್ಕಂತಲೇ ಸರ್ಕಾರ ಅಮೃತ್ ನಗರೋತ್ಥಾನ ಯೋಜನೆ ಅಡಿಯಲ್ಲಿ ಬರೋಬ್ಬರಿ 404 ಕೋಟಿ ರೂಪಾಯಿ ಅನುದಾನ ಕೂಡ ಕೊಟ್ಟಿತ್ತು. ಆದರೀಗ ಬಿಬಿಎಂಪಿ ನಿರ್ಮಾಣ ಮಾಡಲು ಹೊರಟಿರುವ ಹೊಸ ನಾಲ್ಕು ಮೇಲ್ಸೇತುವೆಗಳ ಪೈಕಿ ಸಾರಕ್ಕಿ ಜಂಕ್ಷನ್ ಹಾಗೂ ಕಾಮಾಕ್ಯ ಜಂಕ್ಷನ್ ಫ್ಲೈ ಓವರ್ ಗೆ ನಿರ್ಮಾಣಕ್ಕೂ ಮೊದಲೇ ವಿಘ್ನ ಎದುರಾಗಿದೆ.
ಹೌದು, ನಾಲ್ಕು ಹೊಸ ಮೇಲ್ಸೇತುವೆ ನಿರ್ಮಾಣಕ್ಕೆ ಸರ್ಕಾರದಿಂದ ಪಾಲಕೆ ಭರ್ಜರಿ ಅನುದಾನ ಸಿಕ್ಕಿತ್ತು. ಆದರೆ ಸರ್ಕಾರದಿಂದ ಮೇಲ್ಸೇತುವೆ ನಿರ್ಮಾಣಕ್ಕೆ ಅನುದಾನ ಸಿಕ್ಕರೂ ಬಿಬಿಎಂಪಿಗೆ ಫ್ಲೈ ಓವರ್ ನಿರ್ಮಾಣ ಅಷ್ಟು ಸುಲಭವಾಗಿಲ್ಲ. ಈ ಮೂಲಕ ನಗರದ ನಾಲ್ಕು ಜಂಕ್ಷನ್ ಗಳ ಟ್ರಾಫಿಕ್ ಸಮಸ್ಯೆ ಬಗೆಹರಿಸಲು ಮುಂದಾದ ಬಿಬಿಎಂಪಿಗೆ ಮತ್ತೊಂದು ತಲೆನೋವು ಎದುರಾಗಿದೆ. ನಮ್ಮ ಮೆಟ್ರೋದ ಮೂರನೇ ಹಂತದ ಮಾರ್ಗದ ಪಿಲ್ಲರ್ ಬರುವ ಜಾಗದಲ್ಲೇ ಪಾಲಿಕೆಯಿಂದ ಫ್ಲೈ ಓವರ್ ಗೆ ಸ್ಕೆಚ್ ಹಾಕಲಾಗಿತ್ತು. ಸಾರಕ್ಕಿ ಜಂಕ್ಷನ್ ಹಾಗೂ ಕಾಮಾಕ್ಯ ಜಂಕ್ಷನ್ ಮೇಲ್ಸೇತುವೆ ನಿರ್ಮಾಣಕ್ಕೆ ನಮ್ಮ ಮೆಟ್ರೋ ಹೊಸ ಮಾರ್ಗ ತೊಡಕಾಗಿ ನಿಂತಿದೆ. ಈ ಎರಡೂ 1.2 km ಉದ್ದದ ಫ್ಲೈ ಓವರ್ ಆಗಿದ್ದು ನಮ್ಮ ಮೆಟ್ರೋ 3ನೇ ಹಂತದ ಮಾರ್ಗ ಇದೇ ಜಾಗದಲ್ಲಿ ಹಾದುಹೋಗಲಿದೆ. ಈ ಬಗ್ಗೆ ಮಾತನಾಡಿದ ನಮ್ಮ ಮೆಟ್ರೋ ವ್ಯವಸ್ಥಾಪಕ ನಿರ್ದೇಶಕ ಅಂಜುಮ್ ಪರ್ವೇಜ್, ಬಿಬಿಎಂಪಿ ಮಾಡಲು ಉದ್ದೇಶಿಸಿರುವ ಎರಡು ಫ್ಲೈ ಓವರ್ ಜಾಗದಲ್ಲೇ ನಮ್ಮ ಮೆಟ್ರೋ ಪಿಲ್ಲರ್ ಬರಲಿದೆ. ಮೊದಲ ಹಂತದ ಸಭೆಯಾಗಿದೆ. ಬಿಬಿಎಂಪಿ ಜೊತೆ ಒಂದು ಸುತ್ತಿನ ಮಾತುಕತೆ ನಡೆಸಿದ್ದೇವೆ. ಅವರು ಮೇಲ್ಸೇತುವೆಗೆ ಗುರುತು ಮಾಡಿರುವ ಜಾಗದಿಂದಲೇ ನಮ್ಮ ಮಾರ್ಗವೂ ಹಾದು ಹೋಗುತ್ತಿದೆ. ಹೀಗಾಗಿ ಸಮನ್ವಯ ಸಾಧಿಸಿ ಯಾವ ರೀತಿ ಮತ್ತು ಹೇಗೆ ನಿರ್ಮಾಣ ಎಂಬ ವಿಷಯದ ಬಗ್ಗೆ ಸ್ಪಷ್ಟತೆ ಸಿಗಬೇಕಿದೆ ಎಂದಿದ್ದಾರೆ.
ನಮ್ಮ ಮೆಟ್ರೋದ ಫೇಸ್ 3ಯ ಮಾರ್ಗದ ಕಾಮಾಗರಿ ಹಿನ್ನೆಲೆ ಪಾಲಿಕೆಯ ಹೊಸ ಫ್ಲೈ ಓವರ್ ಗೆ ಅನುದಾನ ಸಿಕ್ಕರೂ ಸಮಸ್ಯೆಯಾಗಿ ಪರಿಣಮಿಸಿದೆ. ಈ ಬಗ್ಗೆ ಈಗಾಗಲೇ ಪಾಲಿಕೆ ಹಾಗೂ ನಮ್ಮ ಮೆಟ್ರೋ ಸಭೆ ನಡೆಸಿದೆಯಾದರೂ ಯಾವುದೇ ರೀತಿಯ ತಾರ್ಕಿಕ ಅಂತ್ಯ ಕಾಣದೆ ಸಭೆ ಮುಕ್ತಾಯಗೊಂಡಿದೆ. ನಮ್ಮ ಮೆಟ್ರೋ ಜೆಪಿನಗರ 4ನೇ ಹಂತದಿಂದ ಹೆಬ್ಬಾಳ ಮಾರ್ಗದ ಮೂರನೇ ಹಂತದ ಕಾಮಾಗರಿಗೆ ಕೈಗೆತ್ತಿಕೊಂಡಿದೆ. ಆದರೆ ಇದೇ ಮಾರ್ಗದ ಎರಡು ಪ್ರಮುಖ ಜಂಕ್ಷನ್ ಗಳಲ್ಲಿ ಮೇಲ್ಸೇತುವೆ ನಿರ್ಮಾಣಕ್ಕೆ ಪಾಲಿಕೆಯೂ ಮುಂದಾಗಿದೆ. ಎರಡೂ ಕಾಮಾಗರಿಗಳು ಒಂದೊಕ್ಕೊಂದು ಹೊಂದಾಣಿಕೆ ಆಗದೆ ಹೋದರೆ ಬಿಬಿಎಂಪಿ ಫ್ಲೈ ಓವರ್ ನಿರ್ಮಾಣ ಸಾಧ್ಯ ಇಲ್ಲ. ಹೀಗಾಗಿ ಸರ್ಕಾರದಿಂದ ಅನುದಾನ ಸಿಕ್ಕರೂ ಹೊಸ ಫ್ಲೈ ಓವರ್ ನಿರ್ಮಾಣ ಮಾಡಲು ಪಾಲಿಕೆ ಪರದಾಡುತ್ತಿದೆ. ಈ ಬಗ್ಗೆ BMRCL ಅಧಿಕಾರಿಗಳು ಹಾಗೂ ನಮ್ಮ ಅಧಿಕಾರಿಗಳ ಸೇರಿ ಹಂತ ಹಂತವಾಗಿ ಸಮಸ್ಯೆ ಬಗೆಹರಿಸುತ್ತೇವೆ. ಎರಡೂ ಕಾಮಾಗರಿ ಆಗುವಂತೆ ಇಂಟಿಗ್ರೇಟೆಡ್ ಫ್ಲೈ ಓವರ್ ನಿರ್ಮಾಣದ ಬಗ್ಗೆ ಯೋಚಿಸುತ್ತಿದ್ದೇವೆ ಎಂದು ಬಿಬಿಎಂಪಿ ಯೋಜನಾ ವಿಭಾಗದ ಚೀಫ್ ಇಂಜಿನಿಯರ್ ಲೋಕೇಶ್ ಹೇಳಿದ್ದಾರೆ.
ಆದರೆ ಇಂಟಿಗ್ರೇಟೆಡ್ ಫ್ಲೈಓವರ್ ಮಾಡಲು ಇರುವ ಸಾಧ್ಯಾಸಾದ್ಯತೆಗಳ ಬಗ್ಗೆ ಪ್ಲ್ಯಾನ್ ರೂಪಿಸಲು ಬಿಬಿಎಂಪಿ ಚಿಂತನೆ ನಡೆಸಿದೆ. ಮೊದಲು ಪಾಲಿಕೆಯ ಫ್ಲೈ ಓವರ್ ನಿರ್ಮಿಸಿ ಆ ಮೇಲ್ಸೇತುವೆಯ ಮೇಲೆಯಿಂದಲೇ ಮೆಟ್ರೋ ಪಿಲ್ಲರ್ ಹಾಕಬಹುದಾದ ಸಾಧ್ಯತೆಗಳ ಬಗ್ಗೆ ಚಿಂತನೆ ನಡೆಯುತ್ತಿದೆ.
