ಕಲಬುರಗಿ: ಬಿಜೆಪಿ ಸರ್ಕಾರ ಜನರ ಆಶೀರ್ವಾದದಿಂದ ಬಂದ ಸರ್ಕಾರವಲ್ಲ, ಆಪರೇಷನ್ ಕಮಲದ ಹೆಸರಿನಲ್ಲಿ ಅಧಿಕಾರಕ್ಕೆ ಬಂದಿರುವ ಸರ್ಕಾರ, ಕ್ರಿಕೆಟ್ ಬೆಟ್ಟಿಂಗ್ ದಂಧೆ, ಡ್ರಗ್ ದಂಧೆ ಮೂಲಕ ಕಲೆಕ್ಷನ್ ಮಾಡಿದ್ದು, ಈಗ ಸರಿಪಡಿಸಿಕೊಳ್ಳಲು ಸರ್ಕಾರಕ್ಕೆ ಆಗ್ತಿಲ್ಲ ಎಂದು ಮಾಜಿ ಸಿಎಂ ಕುಮಾರಸ್ವಾಮಿ ವಾಗ್ದಾಳಿ ನಡೆಸಿದ್ದಾರೆ.
ಕಲಬುರಗಿಯಲ್ಲಿ ಮಾತನಾಡಿದ ಅವರು, ಎನ್.ಇ.ಪಿ ಜಾರಿಗೆ ತರಲು ಸ್ವಾಮೀಜಿಗಳ ನೇತೃತ್ವದಲ್ಲಿ ಸಭೆ ನಡೆಸಿ ಪಠ್ಯ ಪುಸ್ತಕದಲ್ಲಿ ಏನಿರಬೇಕು ಎಂಬ ಚರ್ಚೆ ಮಾಡುತ್ತಿರುವ ಸರ್ಕಾರ ಮೊದಲು ಶಾಲೆಗಳ ಮುಂದೆ ನಡೆಯುತ್ತಿರುವ ಡ್ರಗ್ ದಂಧೆ ನಿಲ್ಲಿಸಲು ಕೈಗೊಂಡ ಯೋಜನೆ ಬಗ್ಗೆ ಹೇಳಲಿ ಎಂದು ಚಾಟಿ ಬಿಸಿದರು.
ಕಳೆದ ಒಂದೂವರೆ ವರ್ಷದ ಹಿಂದೆ ಡ್ರಗ್ ವಿಚಾರ ದೊಡ್ಡ ಮಟ್ಟದ ಸುದ್ದಿಯಾಗಿತ್ತು. ಚಿತ್ರರಂಗದ ಇಬ್ಬರು ನಟಿಯರು ಸೇರಿ ನಾಲ್ಕಾರು ಜನ ಅರೆಸ್ಟ್ ಆಗಿ ಜೈಲಿಗೆ ಹೊಗಿದ್ದರು. ನಂತರ ಅವರೆಲ್ಲಾ ಏನಾದರೂ, ಅವರ ಬಗ್ಗೆ ಬಿ ರಿಪೋರ್ಟ್ ಹಾಕಿದ್ದಾರೋ, ಸಿ ರಿಪೋರ್ಟ್ ಹಾಕಿದ್ದಾರೋ ಇಲ್ಲಾ ಎ ರಿಪೋರ್ಟ್ ಹಾಕಿದ್ದಿರೋ ಗೊತ್ತಿಲ್ಲ, ಆ ಕೇಸ್ ಮುಚ್ಚಿ ಹೋಯಿತು. ನಾನು ಆವತ್ತೆ ಹೇಳಿದ್ದೆ ಪ್ರಕರಣದ ತನಿಖೆ ಹಳ್ಳ ಹಿಡಿಸ್ತಾರೆ ಅಂತಾ ಎಂದರು.
ಪೊಲೀಸರಿಗೆ ದಂಧೆಕೋರರ ಬಗ್ಗೆ ಎಲ್ಲಾ ಮಾಹಿತಿ ಇರುತ್ತದೆ. ಆದರೆ ತಿಂಗಳಿಗೆ ಮಾಮೂಲಿ ಹೋಗುತ್ತೆ, ಹೀಗಾಗಿ ಅವರು ಏನು ಮಾಡಲು ಸಾಧ್ಯವಿಲ್ಲ, ಸ್ಯಾಂಟ್ರೋ ರವಿಯಂತವರಿಗೆ ಕೋಟಿ ಕೋಟಿ ಹಣ ಕೊಟ್ಟು ವರ್ಗಾವಣೆ ತಗೊಂಡು ಬಂದವರು ಏನ್‌ ಮಾಡ್ತಾರೆ, ಮಾಮೂಲಿ ಪಡೆದು ಸುಮ್ಮನಿರುತ್ತಾರೆ ಎಂದರು.
ಬೆಂಗಳೂರಿನಲ್ಲಿ ಮೆಟ್ರೋ ಪಿಲ್ಲರ್ ಕುಸಿದು ತಾಯಿ ಮಗು ಸಾವು ಪ್ರಕರಣ ಕುರಿತಾಗಿ ಮಾತನಾಡಿದ ಕುಮಾರಸ್ವಾಮಿ, ಸರ್ಕಾರ ಇದನ್ನ ಲಘುವಾಗಿ ಪರಿಗಣಿಸಬಾರದು, ನಿತ್ಯ ಜನರು ಓಡಾಡುವ ಸ್ಥಳಗಳಲ್ಲಿ ಹೀಗಾದರೆ ಅದೇಷ್ಟೊ ಕುಟುಂಬಗಳು ಅನಾಥರಾಗ್ತಾರೆ. ಹೀಗಾಗದಂತೆ ಸೂಕ್ತ ಮುನ್ನೆಚ್ಚರಿಕೆ ವಹಿಸಲು ನಿರ್ವಹಣೆದಾರರಿಗೆ ಸರ್ಕಾರ ಸೂಚನೆ ನೀಡಬೇಕು ಎಂದರು.
