ವಿಶ್ವವಿಖ್ಯಾತ ವಿಜ್ಞಾನಿ ಅಲ್ಬರ್ಟ್‌ ಐನ್ಸ್ಟೈನ್ ಅವರಿಗಿಂತ ಹೆಚ್ಚು ಐಕ್ಯೂ (ಬುದ್ಧಿಮತ್ತೆ) ಹೊಂದಿರುವ ಬೆಂಗಳೂರಿನ ಎಂಟು ವರ್ಷದ ಬಾಲಕ ರಿಷಿ ಶಿವ ಪ್ರಸನ್ನ ಅವರಿಗೆ ಪ್ರಧಾನ ಮಂತ್ರಿ ರಾಷ್ಟ್ರೀಯ ಬಾಲ ಪುರಸ್ಕಾರ ಪ್ರಶಸ್ತಿಯನ್ನು ನೀಡಲಾಗಿದೆ. ಇಷ್ಟು ಸಣ್ಣ ವಯಸ್ಸಿನಲ್ಲಿಯೇ 3 ಆಂಡ್ರಾಯ್ಡ್ ಅಪ್ಲಿಕೇಶನ್‌ಗಳನ್ನು ಅಭಿವೃದ್ಧಿಪಡಿಸಿದಕ್ಕಾಗಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಪ್ರಸನ್ನ ಅವರಿಗೆ ಪ್ರಶಸ್ತಿಗಳನ್ನು ನೀಡಿದ್ದಾರೆ.
ಐನ್ಸ್ಟೈನ್ ಅವರು 160 ಐಕ್ಯೂ ಹೊಂದಿದ್ದು, ಪ್ರಸನ್ನ ಅವರು 180 ರ ಪ್ರಮಾಣೀಕೃತ IQ ಅನ್ನು ಹೊಂದಿದ್ದಾರೆ. ಐಕ್ಯೂ ಎನ್ನುವುದು ಒಬ್ಬರ ಬುದ್ಧಿಮತ್ತೆಯ ಅಳೆಯುವ ಮಾನದಂಡವಾಗಿದ್ದು, ಸಾಮಾನ್ಯರಲ್ಲಿ 85-115 ಐಕ್ಯೂ ಇರುತ್ತದೆ. 130 ಕ್ಕೂ ಅಧಿಕ ಐಕ್ಯೂ ಹೊಂದಿರುವ ವ್ಯಕ್ತಿಯನ್ನು ಅತ್ಯಂತ ಬುದ್ಧಿವಂತ ಎಂದು ಪರಿಗಣಿಸಲಾಗುತ್ತದೆ.
ಎಂಟನೇ ವಯಸ್ಸಿನಲ್ಲಿ, ಪ್ರಸನ್ನ ಅವರು ಅತ್ಯಂತ ಕಿರಿಯ ಯೂಟ್ಯೂಬರ್ ಆಗಿದ್ದಾರೆ. ತಮ್ಮ ಯೂಟ್ಯೂಬ್ ವೀಡಿಯೊಗಳಲ್ಲಿ ವಿಜ್ಞಾನಕ್ಕೆ ಸಂಬಂಧಿಸಿದ ವಿಷಯಗಳ ಮಾಹಿತಿಯನ್ನು ಹಂಚಿಕೊಳ್ಳುವ ಅವರು ವೈಜ್ಞಾನಿಕ ಕ್ಷೇತ್ರದಲ್ಲಿ ಆಳವಾದ ಆಸಕ್ತಿಯನ್ನು ಹೊಂದಿದ್ದಾರೆ. ವರದಿಗಳ ಪ್ರಕಾರ ಪ್ರಸನ್ನ ಅವರು ಮೂರು ವರ್ಷ ವಯಸ್ಸಿನಲ್ಲೇ ಸೌರವ್ಯೂಹಗಳು, ಗ್ರಹಗಳು, ಬ್ರಹ್ಮಾಂಡದ ಬಗ್ಗೆ ಮಾತನಾಡುತ್ತಿದ್ದರು.
